(பரிசல்காரன் எழுதிய ) அவியல் 29 ஏப்ரல் 2009

இந்த அவியல் நான் எழுதியதுதான் எனவும் நான் என்பது பரிசல்காரன் ஆகிய என்னைத்தான் குறிக்கும் என்பதையும், என்னை என நான் குறிப்பிடுவது கிருஷ்ணகுமார் ஆகிய...

சரி விடுங்க... கற்பூரம் அடிச்சு சத்தியமா பண்ண முடியும்? நம்புங்கப்பா...

*************************************

ரெண்டு வாரம் முன்னாடி படிச்ச ஒரு நியூஸ். த்ரிஷா நடிச்ச டப்பிங் படம் ஒண்ணு ‘பட்டுக்கோட்டை அழகிரி’ என்கிற பெயரில் வெளிவருவதாக வந்த அறிவிப்பை அடுத்து, பலர் அந்தப் பெயர் நிஜமான பட்டுக்கோட்டை அழகிரியின் புகழுக்கு களங்கம் விளைவிப்பதாகக் கருதியதால் பெயரை மாற்றிவிட்டார்களாம். புதிய பெயரைக் கேள்விப்பட்டதும் என் ரத்தம் கொதித்தது.. இந்தப் பெயர் நிஜமாகவே நம்ம நண்பர் அப்துல்லாவைக் குறிக்கிறதே என்று. உடனே இதுகுறித்து பதிவுலக நண்பர்களிடம் கலந்தாலோசித்து வழக்கு தொடர நினைத்துக் கொண்டிருக்கிறேன்.

படத்தின் புதிய பெயர்: புதுக்கோட்டை அழகன்.

*************************************************

ஜெயா டி.வி-யில் இரவு பத்து மணிக்கு ஒளிபரப்பாகும் வி.பி.எல். (வெட்டிப் பேச்சு லீக்) வயிற்று வலிக்கு காரணியாய் இருக்கிறது. பாஸ்கி, நீலுவை விட நீலுவுக்கு இடதுபுறம் அமர்ந்திருக்கும் (பேரென்னப்பா?) நபர் ரகளை தருகிறார். ஆங்கிலம் என்று அவர் பேசுவதும், நீலு டென்ஷனாவதும் நிஜம் போலவே இருக்கிறது. ஆனால் நீலுவின் முகம் காட்டும் கடுமை நடிப்பல்ல என்று சொல்கிறது.

இரண்டு நாள் முன் தனிமனித ஒழுக்கம் குறித்த விவாதம் நடந்தது அதில். நீலு ஒரு சம்பவம் சொன்னார். அவர் பல வருடங்களுக்கு முன் ப்ரான்ஸ் சென்றிருந்த போது அவர் நண்பர் காரோட்டிக் கொண்டிருந்தாராம். நள்ளிரவு. சாலையில் யாருமே இல்லை. இருந்தும் ரெட் சிக்னலுக்கு நின்று சென்றாராம் நண்பர்.

இதைக் கேட்ட நாணா (சரியா இவர் பெயர்? பாஸ்கிக்கு வலதுபுறம் இருப்பவர்) ‘இது பரவால்ல நான் ரஷ்யா போயிருந்தேன். நானும் ஃப்ரெண்டும் நடந்து போய்ட்டு இருந்தோம். ரோட்ல யாருமே இல்ல. ஆனாலும் ரெட் சிக்னல் பார்த்து ஃப்ரெண்ட் நின்னு போனான்’ என்றார்.

உடனே நம்ம இங்க்லீஷ்காரர் சொன்னார்.

“இது பரவால்ல. நான் செக்கோஸ்லோவாக்கியா போய்ட்டிருந்தேன். ஃப்ளைட்ல. கீழ ரெட் சிக்னல் விழுந்தது. ரோட்ல தானே ரெட் சிக்னல்னு அலட்சியப்படுத்தாம பைலட் நடு வானத்துல அந்தரத்துல ஃப்ளைட்டை நிறுத்தினாரு”

அரை மணிநேரத்துக்கு இடைவிடாமல் சிரித்தேன்!

**********************************************

தமிழ் விளம்பரங்களில் பிரபலங்களின் டப்பிங் குரல் தருவது யார் யார் என்று ஏன் எந்த ஜனரஞ்சகப் பத்திரிகைளும் எழுதுவதில்லை? சச்சின், அமிதாப், ஷாருக் எல்லாரும் தமிழில் பேசினால் எப்படிப் பேசுவார்களோ அதே மாடுலேஷன், குரலில் பேசுவது பாராட்டுக்குரியதல்லவா?

பாவம் இந்தக் கலைஞர்கள்.. 100% பெர்ஃபக்‌ஷன் குடுத்தும் மீடியாக்களில் அடிபடாமல் ஒரு பாராட்டு கூட இல்லாமல் உழைப்பது வேதனைதான்.

எல்லார்க்கும் என் சார்பில் பூச்செண்டுகள்!

***********************************

எங்கள் அலுவலகத்தில் பணிபுரியும் ஊழிய நண்பன். இரண்டு மாதம் முன்பு திருமணம் நடந்தது. சமீபமாக அவனுடன் வெளியில் செல்லும் போது பர்சை ஒன்றுக்கு பலமுறை திறந்து பார்த்துக் கொள்வதைக் கவனித்தேன்.

‘தம்பி... என்னத அப்படி அடிக்கடி பார்த்துக்கற?” நேரடியாகவே கேட்டேன்..

பர்சைத் திறந்து அதை எடுத்தான். 10000, மற்றும் 1000 ருபையா (இந்தோனேஷியன் கரன்ஸி) நோட்டுகள்.

“கல்யாணத்து வந்த எங்க சொந்தக்காரர் குடுத்தார் சார். இந்தியன் ருபீஸா மாத்தற வரைக்கும் பத்திரமா வெச்சுக்கணும்ல சார். எவ்வளவு சார் வரும் ரூபாய்ல?” என்று கேட்டார்.

“பார்த்து சொல்றேன்” என்று அலுவலகம் வந்து xe.com பார்த்தேன்.

11000 இந்தோனேஷியா ருபையா = 50.78 இந்தியன் ரூபாய்கள் என்று வந்தது.

வெறும் அம்பது ரூபாய் 78 காசு!

சொன்னேன்.

“அடுத்த லீவுக்கு அந்தாளு வரட்டும் சார்” என்றான்.

“அப்படியெல்லாம் சொல்லாதப்பா” என்றதுக்கு சொன்னான்.


“கம்மியா இருக்கேன்னெல்லாம் சங்கடமில்ல சார். இரண்டு மூணு நாளா ‘பத்திரமா வெச்சிருக்கயா.. பத்திரமா வெச்சிருக்கயா’ன்னு கேட்டுட்டே இருந்தார் சார். இதுக்காக நூத்தம்பது ரூபா செலவு பண்ணி ஜிப் வெச்ச பர்செல்லாம் வாங்கினேன் சார்” என்றான்.

பாவமாய் இருந்தது!

*************************
இன்றைக்கு தனது புதிய வீட்டிற்கு கிரகப்பிரவேசம் நடத்தும் அண்ணாச்சி வடகரை வேலனது இல்லத்திலும் உள்ளத்திலும் மகிழ்ச்சியும், செல்வமும் தழைத்தோங்க வாழ்த்துக்களும், வேண்டுதல்களும்!

*******************

இனி...

கவிதை – ம்ம்ம்ம்.. சரி வேணாம் சில ஜோக்ஸ்...

நாய் வளர்த்துட்டிருந்த ஒருத்தர் அது குட்டியே போடலன்னு நண்பர்கிட்ட கம்ப்ளெய்ண்ட் பண்ணினாராம். நண்பர் சொன்னாராம்..

“நாயைத் தூக்கி காலி பாத்திரத்துல வெச்சுட்டு காலைல திறந்து பாரு”ன்னாராம் நண்பர்.

இவர் அதே மாதிரி பண்ணி, காலைல பார்த்தா பாத்திரத்துக்கு உள்ளே ஏகப்பட்ட நாய்கள்!

எப்படி?

‘எம்ட்டி வெசல்ஸ் மேக் மோர் நாய்ஸ்!’ (EMPTY VESSELS MAKES MORE NOISE)

************

ஊர்ல ஒரு சொந்தக்காரர் வீட்ல மரணம். அவசர அவசரமா ரயில்வே ஸ்டேஷன்ல போய் டிக்கெட் ரிசர்வ் பண்ணப் போனான் அவன்.

ரிசர்வேஷன் அதிகாரி கேட்டார்: “’பர்த்’ தா?”

இவன் சொன்னான்:

“இல்ல சார். டெத்”

***************
மூணாவது.. ஹலோ.. ஹலோ.. சரி விடுங்க சொல்லல...

.