அவியல் 03.09.2009

நான் சமீபத்தில் மிக ரசித்தபடம் மேலே.

மிக எரிச்சலுற்ற படம் கீ....ழே..

******************************************

வலைப்பதிவர்களில் நான் முதல் முதல் சந்திந்த பதிவர் என்கிற பெருமையைப் பெறும்-மன்னிக்க - பெருமை எனக்கு!- ஆகவே, பதிவர்களில் நான் முதலின் சந்தித்த பதிவர் என்று சொல்லிக் கொள்ளும் பெருமையை எனக்குத்தந்த (கரெக்டா நன்னன் சார்?) வெயிலானை திருப்பூர் வலைப்பதிவர் பேரவையின் தலைவர் என்று நான் சொல்வதுண்டு. நாளாக நாளாக அது நிஜமாகவே ஆகிக்கொண்டிருக்கிறது. (அப்போ இவ்ளோ நாள் சும்மாதான் சொல்லிகிட்டிருந்தியா நீ?) ஒரு தலைவருக்கே உரிய பொறுப்புணர்ச்சியோடு வலைப்பதிவர்களை அடுத்த கட்டத்துக்கு நகர்த்திக் கொண்டிருக்கிறார். சமீபத்தில் திருப்பூர் வலைப்பதிவர்களுக்கென தனித்திரட்டி ஒன்றை உருவாக்கியிருக்கிறார். பார்த்ததும் நானே மிரண்டு விட்டேன். திருப்பூரில் இத்தனை வலைப்பதிவர்களா என்று பிரமிப்பாக இருந்தது.

http://tiruppur-bloggers.blogspot.com

(அந்தப் பக்கத்தில் போனால் வலதுபக்கம் உரையாடல் சிறுகதைப் பட்டறைக்கு ஒரு இணைப்பு கொடுத்திருக்கிறார். ஒரு வார்த்தையை மாற்றிப் படித்து பயந்துவிட்டேன்... ‘என்னடா இப்படி மிரட்டிக் கூப்பிடுகிறார்?’ என்று. பிறகு பொறுமையாய்ப் பார்த்தபோதுதான் புரிந்தது!)

***************************************

நண்பர் தங்கமணி பிரபுவின் ஹிட் கவுண்டரில் அவர் எழுதியிருந்த கேப்ஷன் குபுக்கென சிரிக்க வைத்தது. ஹிட்-64 மனை தெலுங்கு செட்டியார் என்று எழுதி ‘நாங்க கவுண்டர் இல்லீங்க’ என்றிருக்கிறார். வில்லங்கமான மனுஷன்!

அதேபோல நான் மிக ரசித்த ஒரு வலைப்பூ பெயர் ‘என் எழுத்து இகழேல்’.

எழுத்துப் பிழையெல்லாம் இல்லை.. ‘என்’ எழுத்துதான்!

*****************************************

போனவாரம் நான் ‘இந்த வாரப் பதிவர்’ என்று போட்டிருந்த கார்ல்ஸ்பெர்க்கிடமிருந்து அலையழைப்பு. ‘என்ன பாஸ்.. நான் அவ்ளோ நல்லா கதை எழுதுவேன்னு நீங்க நினைக்கறீங்களா?’ என்று கேட்டார். ‘நானெங்கப்பா அப்படிச் சொன்னேன்’ என்று கேட்டதற்கு ‘நீங்கதானே எப்படிக் கதை எழுதன்னு என் படத்தைப் போட்டு க்ளிக்கிப் போய்ப் பாருங்கன்னு சைடு பார்ல (ச்சே.. அங்க இல்லீங்க.. வலைப்பூவோட சைடு பார்!) போட்டிருக்கீங்க..” என்று கலவரப்படுத்தினார்.

பார்த்தால் அவரது படத்துக்கு கீழே உரையாடல் அமைப்பின் சிறுகதைப் பட்டறைக்கான விளம்பரம் கொடுத்திருந்ததை அப்படி எடுத்துக் கொண்டு சந்தோஷப்பட்டிருக்கிறார் மனுஷன்!

அவர் தாமோதரானா இல்ல என்னை தாமோதரனாக்கறாரான்னு தெரியல!

******************

ரொம்ப நாளைக்கு முன்னாடி எனக்கு ரொம்ப வேண்டப்பட்ட நண்பர் ஒருத்தர் அலைபேசினாரு. வழக்கமான பேச்சுகளுக்கு நடுவுல ‘நாளைக்கு என்ன நாள்னு தெரியுமா ஒனக்கு?’ன்னு கேட்டாரு. நான் வேற ஏதேதோ பேசிட்டிருக்க, ‘அதெல்லாம் விடு’ன்னு மறுபடி அதையே கேட்டாரு. தெரியலண்ணா’ன்னு சொன்னேன்.

“வாலண்டைன்ஸ் டேயெல்லாம் ஞாபகம் வெச்சுக்குவீங்கடா. இத மறந்து போகும் உங்களுக்கு..”

“ண்ணா.. அப்படி என்ன நாள்ணா?”

“வள்ளலார் தினம்டா”

“ஓஹோ... உங்களுக்கு எப்படி ஞாபகமிருக்கு?”

“இன்னைக்கு கடைக்காரன் சொன்னான்.. நாளைக்கு கடை லீவுன்னு.. அப்படி ஞாபகம் வந்தது..”

“எந்தக் கடை?”

“டாஸ்மாக்”

டொக்.

*******************************

Body Language என்றொரு விஷயம் இருக்கிறது. இண்டர்வ்யூவில் கலந்து கொள்ள வருபவர்களிடம் இந்த விஷயத்தைப் பார்ப்பது என் வழக்கம். பலரின் வழக்கமாகவும் இருக்கும். நிற்க. (அட.. உட்காருங்க..)

திருப்பூரில் வாகனம் ஓட்டும்போது இந்த Body Language பற்றிய அறிவு உங்களுக்கு இல்லாவிட்டால் ரொம்ப கஷ்டம். டூவீலர் ஓட்டுபவர்கள் இண்டிகேட்டர் எல்லாம் போடமாட்டார்கள். சிக்னல் காட்டமாட்டார்கள். வண்டி ஓட்டும்போதே, எந்தப் பக்கம் அவர்கள் திரும்ப வேண்டுமோ, அந்தப் பக்கமாய் அவர்கள் உடல் ஒரு மாதிரி திரும்பும். திறமையிருந்தால் நீங்கள் அந்த ‘உடல்மொழி’யறிந்து, விபத்தைத் தவிர்க்கலாம். இல்லாவிட்டால் கஷ்டம்தான்!

***********************************

கீழே உள்ள படத்தைப் பாருங்கள்....




தினமலரில் வந்தது இது. விநாயகர் சதுர்த்திக்கு விநாயகர் சிலைக்கு முன் பீரால் அபிஷேகம் செய்கிறார் ஒரு பக்தர்! காதலர் தினத்துக்கு, Pubக்கு எதிர்ப்பு தெரிவித்த கலாச்சாரக் காவலர்கள் இதற்கு என்ன செய்யப் போகிறார்கள்? ‘நாங்க செஞ்சா சரி, நீங்க செஞ்சாதான் தப்பு’ என்று சொல்வார்களோ?

பாலகணேஷ் போல பீர் கணேஷோ?

********************

இந்த வார ‘எப்படி இப்படியெல்லாம்...’


எப்படி இப்படியெல்லாம்?


ஒகேவா? (அடுத்த வாரம் வேற கலர்ல சொல்றேன்..)



.